Daily Archives: March 1st, 2015

የአድዋ ድል በዓል በሀገር ውስጭና በውጭ ባሉ ኢትዮጵያውን እየተከበረ ነው

ብስራት ወልደሚካኤል

adwa1

በዳግማዊ አጼ ምኒልክ ዘመን የጣሊያን ጦር ኢትዮጵያን በቅኝ ለመግዛት በያዝነው የካቲት 1888ዓ.ም. ባደረገው ወረራ በኢትዮጵውያን አርበኞች በአዋድዋ ላይ ድል የተደረገበት 119ኛ ዓመት በሀገር ውስጥና በውጭ ባሉ ኢትዮጵያውን እየተከበረ ይገኛል፡፡

በዓሉ ምንም እንኳ በኢትዮጵውን የተገኘ ቢሆንም፤ በቅኝ ግዛት የነበሩ የአፍሪካ ሀገሮችና ሌሎችም ራሳቸውን ነፃ ማውጣት እንደሚችሉ ከፍተኛ መነሳሳት እንደፈጠረና በቅን የተገዙ ሀገሮች ከአውሮፓ ቅኝ ግዛት ነፃ እንዲወጡ ዕድል እንደፈጠረላቸው በርካታ የታሪክ ድርሳናት ያስረዳሉ፡፡ ስለሆነም በዓሉ በተለይ ከኢትዮጵያ ባለፈ የጥቁሮች ድል ተደርጎም እየተቆጠረ ይገኛል፡፡

በወቅቱ ጣሊያኖች እጅግ ውድና ዘመን ያፈራውን የውጊያ መሳሪያ የተጠቀሙ ሲሆን፤በውጊያውም በጣሊያን በኩል በርካታ የጣሊያን ወታደሮችና ኢትዮጵውን ባንዳዎች ሲሰለፉ፤ኢትዮጵውያን ደግሞ ከተወሰኑ ጊዜ ያለፈባቸው ዘመናዊ የጦር መሳሪያዎች በስተቀር ለውጊያው የተጠቀሙት ኋላ ቀርና በሀገር ውስጥ የተለመዱ መሳሪያዎችን ነበር፡፡

የጦርነቱም መንስኤ የውጫሌ ውል አንቀፅ 17 ሲሆን፤ ጣሊያን በውሉ ላይ በአማርኛውና በእንግሊዘኛው ትርጉም ሆን ብላ እንዲለያይ በማድረግ ኢትዮጵያን በቀላሉ በቅኝ ለመግዛት መነሳቷን ተክትሎ እንደነበር ይታወቃል፡፡ በጦርነቱም በርካታ ኢትዮጵያውያን ምንም ተቀጥላና ልጥፍ የሌለበትን የሀገሪቱን አረንጓዴ፣ ቢጫ ቀይ ደማቅ ሰንደቅዓላማ በመያዝ ፆታ፣ዕድሜ፣ቋንቋና ኃይማኖት ሳይገድባቸው ሀገራችንን ነፃ ለማውጣት ከሁሉም የሀገሪቱ አቅጣጫ በእግርና በፈረስ በሚደረግ ረጅም አድካሚ ጉዞ የተሳተፉ ሲሆን፤ በጦርነቱ በርካታ ኢትዮጵያውያን ህይወታቸው አልፏል፡፡ ከጣሊያን ጦርም እንዲሁ በርካታ ሰዎች ሲሞት ብዙዎች ተማርከው ከድሉ በኋላ በዓለም አቀፍ ስምምነት መሰረት ከእስር ተለቀዋል፡፡

ውጊያውን በአዋጅ በማስነገር የመሩትና ወደ አድዋ የሸዋን ጦር ይዘው የዘመቱት የወቅት የኢትዮጵያው ንጉሰ ነገስት ዳግማዊ አጼ ምኒልክና ባለቤታቸው እቴጌ ጣይቱ ሲሆኑ፤እንደየ ማዕረጋቸውም ከተለያየ የሀገሪቱ አቅጣጫ ያለውን ጦር ይመሩ የነበሩ የተለያዩ የጦር አመራሮችም ንጉሱን በመከተል በአድዋው ጦርነት ላይ ተሳትፈው ሀገሪቱንና ህዝቧን ከቅኝ ግዛት ነፃ አውጥተዋል፡፡ ይህንንም ድል ሆነ ተሳታፊዎችን ማንም፣ መቼም በምንም ሊሽር በማይችል መልኩ በዓለም ታሪክ ሰፍሮ እንዲህ እየተዘከረ ይገኛል፡፡

Adwa2

በተለይ የጦሩ ጠቅላይ አዛዥ ራስ ጎበና፣ የጦር ሚኒስትሩ ፊታውራሪ ሀብተጊዮርጊስ ዲ-ነግዴ፣ራስ አሉላ አባነጋ፣ ፊታውራሪ ገበየሁ አባተ፣ራስ መንገሻ ስዩም፣ ባሻ አዋዓሎም (የጠላትን ጦር በመሰለልና መረጃ ለንጉሱ በመስጠት)፣ራስ መኮንን ወልደሚካኤል ጉዲሳ (የአጼ ኃይለስላሴ አባት፤ የውጭ ጉዳይ ዲፕሎማሲውን በብቃት በመወጣትና የሐረርን ጦር በመምራት፣ የወሎው አስተዳዳሪ ራስ ዓሊ፣ ደጃዝማች ባልቻ አባሳፎ (ባልቻ አባ ነፍሶ)፣ ራስ  አባተ ቧ ያለው፣…እና ሌሎችም ግንባር ቀደም የጦር አመራሮች ከነወታደሮቻቸው ከፍተኛ ተጋድሎ በመፈፀም ለዛሬው የኢትዮጵያና ለመላው ጥቁር ወርቃማ የድል ታሪክ አብቅተዋል፡፡ ይህ በኢትዮጵያውያን በተገኘው ተጋድሎ የድሉ ታሪክም በአፍሪካና በመላው ዓለም ወርቃማ የጥቁር ድል ታሪክ ሆኖ በክብር ተመዝግቦ ይገኛል፡፡

ወርቃማ የህዝብ ታሪክ ዘመን ሳይሽረው ከትውልድ ወደ ትውልድ እንዲህ እየተዘከረ ይኖራል፡፡ በትግሉ ዋጋ የከፈሉና የሰው አያቶቻችንን ነፍስ ፈጣሪ በገነት ያኑርልን፡፡

ክብር ለሚገባው ክብር እንስጥ፤ ክብር ለአድዋ ጀግኖች፣ ክብር ለነፃነት ላበቁን አባቶቻችን እና እናቶቻችን!!

Advertisements

የሆሳዕና ደብረ ገነት ቅድስት ማርያም ቤተክርስቲያን ተቃጠለ

የሆሳዕከና ከተማ ቅድስት ማርያም ቤተክርስቲያን ከመቃጠሉ በፊት

የሆሳዕከና ከተማ ቅድስት ማርያም ቤተክርስቲያን ከመቃጠሉ በፊት

በደቡብ ክልል በከንባታ፣ሀዲያ፣ጉራጌና ስልጤ ሀገረ ስብከት፤ሆሳዕና ከተማ የሚገኘው ታሪካዊው የኢትዮጵያ ኦርቶዶክስ ተዋህዶ ቤተክርስቲያን መንበረ ጵጵስና ደብረ ገነት ቅድስት ማርያም ቤተክርስቲያን ተቃጠለ፡፡ የእሳት አደጋ ቃጠሎው የደረሰው ትናንት የካቲት 21 ቀን 2007 ዓ.ም. ሲሆን፤ የቃጠሎው መንስኤ እስካሁን አልታወቀም፡፡ በረደሰው ቃጠሎ የቤተክርስቲያኗ ህንፃ ላይ ከፍተኛ ጉዳት የደረሰ ሲሆን፤ የጉዳቱ መጠን በአሀዝ ግን እስካሁን የተገለፀ ነገር የለም፡፡ በደረሰው የቃጠሎው አደጋ በቤተክርስቲያኗ የነበሩ ታሪካዊ ቅዱሳት መፃህፍትን ጨምሮ በርካታ ንብረቶች መውደማቸው የተገለፀ ሲሆን፤ የአካባቢው ህዝብ እሳቱን ለማጥፋት ባደረገው ርብርብ ታቦታቱን ከአደጋው ማትረፍ መቻሉን ከስፍራው የመረጃው ምንጮቻችን ጠቁመዋል፡፡

እሳቱንም ለማጥፋት በተደረገው ርብርብ ከከተማው የኦርቶዶክስ ኃይማኖት ተከታይ ምዕመናን በተጨማሪ በርካታ የአካባቢው የእስልምና እና የፕሮቴስታንት ኃይማኖት ተከታዮች በፍጥነት ደርሰው መሳተፋቸውንና በዚሀም ታሪካዊ የብራና መፅሐፍቱን እና ታቦታቱን ማዳን እንደተቻለ ከስፍራው የደረሱን መረጃዎች አመልክተዋል፡፡ ጀቤተክርስቲያኗን ጨምሮ በቤተመቅደሱ ውስጥ ያሉ ሌሎች ንብረቶች በቃጠሎው አደጋ ሙሉ ሙሉ መውደዋማቸው ታውቋል፡፡ ይሄንንም የሀዲያ ዞን ዋና አስተዳዳሪ፣የዞኑ የፀጥታ ዘርፍ ዋና ኃላፊ፣ የከተማው የሆሳዕና ከተማ ከንቲባ፣ የከተማው የእስልምና እና የፕሬቴስታንት ኃይማኖት መሪዎች በስፍራው በአካል በመገኘት ቤተክርስቲያኗ ታንፃ ወደ ቀድሞ ይዞታ እስክትመለስ ድረስ በግላቸው አስፈላጊውን ድጋፍ እንደሚያደርጉ ለቤተክርስቲያኗ አስተዳዳሪዎችና ሰባካ ጉባዔ ቃል መግባታቸውም ተነግሯል፡፡ ነገ ሰኞ የካቲት 23 ቀን 2007 ዓ.ም. የሀገረ ስብከቱና የአዲስ አበባ ሀገረ ስብከት ሊቀጳጳስ ብፁዕ አቡነ ቀለምኒጦስ በተገኙበት  የቤተክርስቲያኗ የህንፃ አሰሪ ኮሚቴ እንደሚዋቀርና የገቢ ማሰባሰቢያ መርሃ ግብርም ይፋ እንደሚደረግ ከሆሳዕና የደረሰን መረጃ አመልክቷል፡፡

የሆሳዕከና ከተማ ቅድስት ማርያም ቤተክርስቲያን የእሳት አደጋ በደረሰበት ወቅት

የሆሳዕከና ከተማ ቅድስት ማርያም ቤተክርስቲያን የእሳት አደጋ በደረሰበት ወቅት

በሆሳዕና ከተማ በርካታ የመንግሥትና የህዝብ ተቅማት ቢኖሩም፤አሁን ከደረሰው የቤተክርስቲያን ቃጠሎ በተጨማሪ ከዚህ በፊት በደረሱ የእሳት አደጋዎች ከተለመደው የህዝብ ርብር ውጭ የከተማው መስተዳደር የእሳት አደጋ መከላከያ ዝግጅትም ሆነ መሳሪያ ባለመኖሩ በርካታ የንግድ ሱቆች ተቃጥለው በሚሊዮን የሚቆጠሩ ንብረቶች መውደማቸው አይዘነጋም፡፡

የካቲት 21 ቀን 2007 ዓ.ም.  በደረሰው ድንገተኛ የእሳት አደጋ ቃጠሎ ምክንያት 106 ዓመታት ዕድሜ ያስቆጠረው ታሪካዊው የሆሳዕና ደብረ ገነት ቅድስት ማርያም ቤተክርስቲያን ህንፃ ሙሉ ለሙሉ መውደሙ ይታወቃል፡፡ ስለሆነም በተቃጠለው ቤተክርስቲያን ምትክ አዲስ ህንፃ ቤተክርስቲያን ለማሰራት በይፋ እንቅስቃሴ በመጀመሩ፤ የገንዘብ ድጋፍ ማድረግ ለምትፈልጉ፡-

የኢትዮጵያ ንግድ ባንክ፣

ባቴና ቅርንጫፍ፤ ሆሳዕና

ዝግ የባንክ አካውንት ቁጥር  100 011 0719 969

መርዳት እንደሚቻል በመጠቆም፤ ለምታደርጉት ድጋፍ ሁሉ በቤተክርስቲያኗ ስም ከወዲሁ ማመስገኑን የህንፃ አሰሪው ኮሜቴ አስታውቋል፡፡

ለበለጠ መረጃ 

ሀገር ውስጥ ላሉ በስልክ ቁጥር 0912- 446829 ወይም 0913-750229

ከውጭ ሀገር ከሆነ  +254 912-446829 ወይም +254 913 750229  ማነጋገር እንደሚቻል የህንፃ አሰሪው ኮሚቴ አስታውቋል፡፡

%d bloggers like this: