Category Archives: Social and Culture

ወይዘሪት ንግስት ይርጋ በክሷ ምክንያት በደል እየደረሰባት እንደሆነ ተገለፀ

ጌታቸው ሺፈራው

የ”ሽብር” ክስ የተመሰረተባት ንግስት ይርጋ በክሷ ምክንያት ማረሚያ ቤት ውስጥ በደል እየደረሰባት መሆኑን ጠበቃዋ ለፍርድ ቤቱ ገልፀዋል። ንግስት ይርጋ በቤተሰብ ጥየቃ ገደብ እየተደረገባት መሆኑን ለፍርድ ቤት አቤቱታ ባቀረበችው መሰረት ፍርድ ቤቱ ምንም ገደብ ሳይደረግባት እንድትጠየቅ ቢወስንም የቃሊቲ ማረሚያ ቤት የፍርድ ቤቱን ትዕዛዝ ሳያከብር ቀርቷል።

ፍርድ ቤቱ ትዕዛዙን ለምን እንዳላከበረ በችሎት እንዲያስረዳ ትዕዛዝ ቢልክም ማረሚያ ቤቱ በሁለት ቀጠሮች ቀርቦ አላስረዳም። የፌደራል ከፍተኛ ፍርድ ቤት ልደታ ምድብ 4ኛ ወንጀል ችሎት ለ3ኛ ጊዜ በሰጠው ትዕዛዝ ዛሬ ህዳር 1 ቀን 2010 ዓ.ም.ሁለት ኃላፊዎች ቀርበዋል።

የፌደራል ማረሚያ ቤቶች አስተዳደር የፍትህ አስተዳደር ዳይሬክቶሬት ዳይሬክተር ዋና ሱፐር ኢንተንደንት አስቻለው መኮንን የማረሚያ ቤቱን እና የታራሚውን ደህንነት ለማስጠበቅ ሲባል ንግስት ተለይታ እንደምትጠየቅ፣ እንዲሁም ሁሉን እስረኛ በተመሳሳይ ሰዓት ማስተናገድ ስለማይቻል የንግስት ጥየቃ ሰዓት ከሌሎች እስረኞች የተለየ መሆኑን እና ባስመዘገበችው የቤተሰብ አባላት እየተጠየቀች መሆኑን አስረድተዋል።

ንግስት ይርጋ በበኩሏ ወደ ቃሊቲ ማረሚያ ቤት ስትገባ የሚጠይቋትን አስመዝግቢ መባሏንና ከተመዘገቡት ውጭ ያሉና 720 ኪሎ ሜትር ርቀት ድረስ ሊጠይቋት የሚመጡ ዘመድና ወዳጆቿ አልተመዘገባችሁም እየተባሉ እንደሚመለሱ ለፍርድ ቤቱ ገልፃለች። ጉዳዩን ለፍርድ ቤት በአቤቱታ አቅርባ ገደብ እንዳይደረግባት ብይን ቢሰጥም ማረሚያ ቤቱ ትዕዛዝን አለማክበሩን አስታውሳለች። ማረሚያ ቤቱ ለምን የፍርድ ቤቱን ትዕዛዝ እንደማያከብር በጠየቀችበት ወቅትም የሴቶች ጥበቃ እና ማረፊያ አስተዳደር ኃላፊ ዋና ሱፐር ኢንተንደንት አለም ጥላሁን “ይህን ትዕዛዝ የሰጠው ዳኛ ማን ነው? ማወቅ እፈልጋለሁ።” እንዳሏትና እኚህ ኃላፊ ችሎት ውስጥ እንደሚገኙ ለፍርድ ቤቱ አስረድታለች።

ሆኖም ፍርድ ቤቱ ችሎት ውስጥ የነበሩትን ኃለፊ ለምን ይህን እንዳሉ መልስ እንዲሰጡ ሳይጠይቃቸው ቀርቷል። ማረሚያ ቤቱ ለፍርድ ቤቱ በፅሁፍ በሰጠው መልስ ላይ የፈረሙት የሴቶች ጥበቃና ማረፊያ አስተዳደር ጥበቃና ደኅንነት ስራ ዘርፍ ኃላፊ ለተ እግዜር ገ/ መድኅን ናቸው። ሆኖም ትዕዛዙን ለፍርድ ቤት ያደረሱትና በቃል መልስ የሰጡት የለተ እግዜር ኃላፊ ናቸው የተባሉት ዋና ሱፐር አለም ናቸው።
ማረሚያ ቤቱ ኃላፊዎች ከሰጡት መልስ በተቃራኒ ገደብ እየተደረገባት መሆኑን ንግስት ለፍርድ ቤቱ ገልፃለች። በሀገራችን ባህል የታመመ እና የታሰረ ሰው ማንም እንደሚጠይቀው ያስታወሰችው ንግስት ይርጋ ጠያቂዎቿ መታወቂያ እስከያዙ እና ጠያቂና እሷን የሚቆጣጠሩ ፖሊሶች እስካሉ ድረስ በማንኛውም ሰው መጠየቅ መብቷ እንደሆነ ገልፃለች።

“ማንኛውም የተከሰሰ ሰው ነፃ ሆኖ የመገመት መብት አለው” ያሉት ጠበቃ ሄኖክ አክሉሉ በበኩላቸው፣ ማረሚያ ቤቱ ንግስት ይርጋን በክሷ ምክንያት በደል እየፈፀመባት እንደሚገኝ ለፍርድ ቤቱ አስረድተዋል። የፌደራል ማረሚያ ቤቱ ተወካይ ከገለፁት በተቃራኒ ሌሎች እስረኞች ከ3 ሰዓት እስከ 6 ሰዓት ሲጠየቁ ንግስት ይርጋ ከ6 እስከ 7 ሰዓት ባለው አንድ ሰዓት ብቻ እንደምትጠየቅ ገልፀውም ማረሚያ ቤቱ የሚያደርሰውን አድሎ አስረድተዋል። ካስመዘገብሽው ውጭ አትጠየቂም የሚለው የማረሚያ ቤቱ አሰራርም ህገ መንግስታዊ እንዳልሆነ ገልፀዋል።

የንግስት ይርጋ ሌላኛው ጠበቃ አቶ አለልኝ ምህረቱ ፍርድ ቤቱ የቃሊቲ ማረሚያ ቤት መልስ እንዲሰጥ ትዕዛዝ ቢሰጥም፣ መልስ ለመስጠት የመጡት የእስረኞችን የዕለት ተዕለት ጉዳይ የማይከታተሉ የፌደራል ማረሚያ ቤት ኃላፊ መሆናቸው ጉዳዩን በደንብ እንደማያውቁት ለፍርድ ቤቱ አስረድተዋል። የቃሊቲ ማረሚያ ቤት ባስመዘገበቻቸው ዘመድና ጓደኛ እየተጠየቀች ነው ያለ ሲሆን አቶ አለልኝ በበኩላቸው ህገ መንግስቱ የቅርብ ዘመድ እና ጓደኛ ሲል ወሰን እንደሌለው፣ ከዚህ መለስ ተብሎ ሊገደብ እንደማይገባ አብራርተዋል።
በንግስት አቤቱታ ጉዳይ ቀጠሮ የተሰጠው ማረሚያ ቤቱ የፍርድ ቤቱን ትዕዛዝ ለምን እንዳላከበረ ቀርቦ እንዲያስረዳ ለማዳመጥ የነበር ቢሆንም ዛሬም የሁለቱን ክርክር አዳምጦ ትዕዛዝ ሰጥቷል።

በዚህም መሰረት ንግስት ይርጋ በህገ መንግስቱ አንቀፅ 21 መሰረት ገደብ ሳይደረግባት እንድትጠየቅ ትዕዛዝ ሰጥቷል። የማረሚያ ቤቱ ኃላፊዎች ንግስት ይርጋ የማይገባ ጭቅጭቅ ማድረጓን ባይገልፁም ፍርድ ቤቱ ” ተከሳሽም የማይገባ ጭቅጭቅ ውስጥ ላለመግባት ጥንቃቄ ያድርጉ፣ ህጉን ለይተው አውቀው ይጠቀሙ” ብሏዋል። ከችሎት ውጭ ያነጋገርኳቸው የንግስት ጠበቆች ንግስት መሰል ባህሪ አሳይታለች ባልተባለበት ፍርድ ቤቱ ያልተነሳ ነገር ላይ ለተከሳሽ ትዕዛዝ መስጠቱ ተገቢ አይደለም ብለዋል። በሌላ በኩል ንግስት ይርጋ ጥርሷን ታማ መድሃኒት ቢታዘዝላትም መድሃኒቱ በታዘዘላት ሰዓት እየተሰጣት እንዳልሆነ አቤቱታ አቅርባለች።

የማረሚያ ቤቱን መልስ ከመስማት በተጨማሪ እነ ንግስት ይከላከሉ ወይስ አይከላከሉ በሚለው ላይ ብይን ለመስጠት ተቀጥረው የነበር ቢሆንም ፍርድ ቤቱ “መዝገቡ ተመርምሯል።ጊዜ አግኝተን ማጠቃለል አልቻልንም” ብሎ ለህዳር 5/2010ዓ•ም ለብይን ሌላ ቀጠሮ ሰጥቷል።

Advertisements

የኮ/ል ደመቀ ዘውዱ የፍርድ ቤት ውሎ

ጌታቸው ሺፈራው

ፍርድ ቤቱ ኮ/ል ደመቀ ያቀረቡትን መቃወሚያ በመቀበል የብሔራዊ ደኅንነት እና መረጃ አገልግሎት ያቀረበው ሪፖርት አልተረጋገጠም ብሏል! በመሆኑም ኮ/ል ደመቀ ዘውዱ ባቀረቡት መቃወሚያ መሰረት የቀረበባቸው ማስረጃ ትክክለኛ መሆኑን ለማረጋገጥ የድምፅ ቅጅ እንዲመጣ ታዟል። ከሌሎች ግለሰቦች ጋር ተደዋውለውባቸዋል የተባሉት የስልክ ቁጥሮችም እንዲጠቀሱና እንዲረጋገጡ ተበይኗል።

ኮ/ል ደመቀ ዘውዱ ጥቅምት 27 ቀን 2010 ዓም ጎንደር ከተማ ላይ ከሚያስችለው የአማራ ክልል ጠቅላይ ፍርድ ቤት ለብይን ተቀጥረው እንደነበር ይታወሳል። የፌደራል ጠቅላይ ዐቃቤ ሕግ በኮ/ል ደመቀ ዘውዱ ላይ ባቀረበው የ”ሽብር” ክስ የሰው ምስክሮችን ማሰማቱን እንዲሁም፣ የሰነድ ማስረጃዎችን አጠናቅቄ አቅርቤያለሁ በማለት ፍርድ ቤቱ ተከሳሹ የቀረበባቸውን ክስ ይከላከሉ ወይም መከላከል አይገባቸውም የሚል ብይን እንዲሰጥ ጠይቆ ነበር። በመሆኑም የአቃቤ ህግ ማስረጃዎችን መርምሮ ብይን ለመስጠት ለጥቅምት27/2010 ዓም ቀጠሮ ይዞ ነበር።

የፌደራል ጠቅላይ ዐቃቤ ሕግ በማስረጃነት ያቀረበው የብሔራዊ መረጃ ደኅንነት አገልግሎት ያዘጋጀውና ከስልክ ምልልስ ተገኘ የተባለ ሪፖርት “ኮ/ል ደመቀ ዘውዱ የሽብር ወንጀል ለመፈፀም የተለያዩ የስልክ ቁጥሮችን በመጠቀም ለነ መብራቱ ጌታሁን፣ አታላይ ዛፌ እና ለሌሎች ግለሰቦች ስልክ በመደወል ስለ “ወንጀሉ” ሲነጋገሩ ቆይተዋል” የሚል ሰፋ ያለ ይዘት ያለው ማስረጃ እንደነበር ተገልፆአል።

የተከሳሽ ጠበቆች በበኩላቸው ፍርድ ቤቱ ተከሳሹን ተከላከል ወይንም መከላከል አይገባህም በሚል ብይን ከመስጠቱ በፊት የሰነድ ማስረጃዎቹ በሕጋዊ መንገድ ያልተገኙ ናቸው በማለት ሰፋ ያለ መቃወሚያ አቅርበዋል። ካቀረቧቸው መቃወሚያዎች መካከል ዋናው የብሔራዊ መረጃና ደኅንነት አገልግሎት ከስልክ ምልልስ ያገኘሁት ነው ብሎ ያዘጋጀው ሪፖርት ኮ/ል ደመቀ ዘውዱ ያደረጉት የስልክ ንግግር እንዳልሆነ በሰፊው አትቷል። መቃወሚያው የስልክ ንግግር ቀጥተኛ ማስረጃው ድምፅ በመሆኑ ይህ ማስረጃ ከስልክ ንግግር ወደ ፅሑፍ መለወጡ ከተረጋገጠ ወደ ፅሑፍ የተለወጠው የድምፅ ቅጅ ሊቀርብ ይገባው ነበር የሚል ነበር።

በሌላ በኩልም ኮ/ል ደመቀ ዘውዱ በስልክ አግኝተዋቸዋል የተባሉ ግለሰቦች ስልክ ቁጥር አለመጠቀሱ ሪፖርቱ ከስልክ ምልልስ የተገኘ መሆኑን ስለማያረጋግጥ የሰነድ ማስረጃው ውድቅ እንዲደረግልን በማለት መቃወሚያዎችን አቅርበው የነበር ሲሆን ፍርድ ቤቱ መቃወሚያዎቹን ተቀብሏቸዋል።

ፍርድ ቤቱ ወደ ዋናው ክርክር ገብቶ ብይን ከመስጠቱ በፊት መቃወሚያ የቀረበባቸው የሰነድ ማስረጃዎች ትክክለኛ መሆናቸው ካልተረጋገጠ በፍሬ ጉዳይ ላይ ብይን መስጠት እንደማይችል መግለፁን ጠበቃ አለልኝ ምህረቱ ገልፀዋል። የኮ/ል ደመቀ ዘውዱ ጠበቆች መካከል አንዱ የሆኑት አቶ አለልኝ ምህረቱ እንደገለፁት ፍርድ ቤቱ ማስረጃዎቹ ያልተረጋገጡ ስለመሆናቸው ሁለት ዋና ዋና ምክንያቶችን አስቀምጧል። እነዚህም:_
1) የብሔራዊ መረጃና ደኅንነት አገልግሎት ሪፖርቱን አገኘሁት ያለው ከስልክ ምልልስ ነው ከተባለ፣ በተከሳሽና በሌሎቹ ግለሰቦች መካከል ተደረገ የተባለው የስልክ ምልልስ በትክክል ሊኖር ስለሚችል ወደፅሑፍ መቀየሩን ወይም የተቀነሰ እና የተጨመረበት ነገርም ካለ ይህን ማጣራት አስፈላጊ በመሆኑ፣
2)ከኮለኔል ደመቀ ዘውዱ ጋር ስለ “ሽብር ወንጀል” ተነጋገሩ የተባሉ ግለሰቦች ስልክ ቁጥሮች በብሔራዊ መረጃና ደኅንነት አገልግሎት ሪፖርት ላይ ስላልተጠቀሱ ኮ/ል ደመቀ ዘውዱ በስልክ አነጋግረዋቸዋል የተባሉት ግለሰቦች የስልክ ቁጥሮች እና ኮ/ል ደመቀ ዘውዱ ተገናኙባቸው ተብለው በሪፖርቱ የተጠቀሱ ስልክ ቁጥሮች የእርሳቸው ስለመሆናቸው ማረጋገጥ ያስፈልጋል የሚሉ ናቸው።

ፍርድ ቤቱ የብሔራዊ ደኅንነትና መረጃ አገልግሎት ሪፖርትን በማጣራት የሰነድ ማስረጃ ላይ በቀረበው መቃወሚያ ላይ ውሳኔ መስጠት እንዲያስችለውም ሁለት ትዕዛዞችን አስተላልፏል። ትዕዛዞቹም:_
1ኛ) የብሔራዊ ደኅንነትና መረጃ አገልግሎት ለዐቃቤ ሕግ ማስረጃነት በሪፖርት ያቀረበው ከስልክ ምልልስ ተገኘ የተባለ ሪፖርት ያዘጋጀበትን የስልክ ምልልስ የድምፅ ቅጅ እንዲያቀርብ እና፣
2ኛ) ከኮ/ል ደመቀ ዘውዱ ጋር በስልክ ተገናኙ የተባሉት ግለሰቦች ስልክ ቁጥሮች፣ እንዲሁም እነዚህ ስልክ ቁጥሮች ኮ/ል ደመቀ ዘውዱ ደወሉባቸው ከተባሉት ስልክ ቁጥሮች ጋር ግንኙነት የነበራቸው መሆንን የሚያሳይ ማስረጃ እንዲቀርብ ትዕዛዝ ሰጥቷል። ዐቃበ ህግ እነዚህን ማስረጃዎች እንዲያቀርብም ለህዳር 19/2010 ዓም ቀጠሮ ተይዟል።

ፍርድ ቤቶች በ”ሽብር ወንጀል” ላይ የብሔራዊ ደኅንነትና መረጃ አገልግሎት ከስልክ ምልልስ ያገኘሁት ነው ብሎ የሚፅፈው ሪፖርትን ለማረጋገጥ የድምፅ ቅጅ በማስመጣት ከማረጋገጥ ይልቅ ሪፖርቱን በቀጥታ እየተቀበሉ ይገኛሉ። በኮ/ል ደመቀ ላይ የቀረበው የደኅንነት ሪፖርቱ ላይ መቃወሚያ ካቀረቡት መካከል አንዱ የሆኑት ጠበቃ አለልኝ በኮ/ል ደመቀ ተቃውሞ ላይ የተሰጠውን ትዕዛዝ ሌሎች መሰል ክሱችን የሚያስችሉ ችሎቶችም ቢጠቀሙበት “ዳኞች ተገዥነታቸው ለህሊናቸውና ለሕጉ ብቻ ነው !” የሚለውን መርህ ማስከበር ይቻል ነበር ብለዋል።

የፍርድ ቤት ችሎት ትዝብት

ማህሌት ፋንታሁን

የጥቅምት 16 ቀን 2010 ዓ.ም. የፌደራሉ ከፍተኛ ፍርድ ቤት ልደታ ምድብ 4ኛ ወንጀል ችሎት ትዝብት። ብዙ መዝገቦች በቀጠሯቸው መሰረት ሳይሰሩ ተለዋጭ ቀጠሮዎች እየተሰጠባቸው ነው። የሚሰጠው ምክንያት ‘ለችሎቱ አዲስ ዳኞች በመሆናችን’ የሚል ነው። ተከሳሾችም በጉዳያቸው አላግባብ መራዘም እና በማረሚያ ቤት በሚደርስባቸው በደል ተማረው አቤቱታቸውን እያሰሙ ነው።
የዛሬዎቹን አቤቱታዎች በስሱ እነሆ!

� አቤቱታ አንድ። በእነ ክንዱ ዱቤ መዝገብ 2ኛ ተከሳሽ ዘመነ ጌቴ ፤ “ማእከላዊ እያለሁ አካላዊ እና ስነልቦናዊ ግፍ እና በደል ደርሶብኛል። በድቅድቅ ጨለማ ለ6ወር ተቀምጫለሁ። በድብደባ ብዛት የግራ አይኔ ማየት አይችልም። ዘሬን እንዳልተካ የዘር ፍሬዬን መተውኛል። አማራነታችን እየተጠቀሰ ይሰድቡናል። እኛ ስንወለድ አማራ ሆነን ወይም ኦሮሞ ሆነን መወለድ ፈልገን አይደለም። የተፈጥሮ ነገር ሆኖ ነው። አማራ አህያ ነው። አማራ ጅብ ነው። አህያውን በጅቡ እናስበላዋለን ይሉናል። በማእከላዊ የነበረው ስቃይም ተከትሎኝ ቂሊንጦ መጥቷል። የማረሚያ ቤቱ ፖሊሶች እየጠሩ ይደበድቡኛል። ምንም አይነት የመኖር ህልውና የለንም።” ዘመነ ጌቴ ይህን እያለ ዳኞቹ እንዲያበቃ/እንዲያቆም ሲነግሩት አብዛኞቹ እስረኞች ‘ይናገር! የሆነውን ነው ሚያወራው’ በማለት መናገሩን እንዲቀጥል ጠይቀዋል። ዘመነ ጌቴ ይህን ብሎ አቤቱታውን አጠቃሏል። “ስቃዬን እየተናገርኩ ነው። ስነልቦናዊ እና አካላዊ ጉዳት ደርሶብኛል፤ እየደረሰብኝም ነው። ፍርድ ቤቱ መፍትሄ ይሰጥልኝ ዘንድ ነው የምናገረው።”

�አቤቱታ ሁለት። በእነ ተሻገር ወ/ሚካኤል መዝገብ አባ ገ/እየሱስ ፤ “ማእከላዊ የደረሰብንን ግፍ ከዚ ቀደም ተናግረናል። ቂሊንጦ ከገባሁ በኋላ ችግር እየተከሰተብኝ ነው። ከወንድሞቼ ጋር እንዳልገናኝ እና አብሬ እንዳልበላ ይከለክሉኛል። ኦፊሰር ካሱ የሚባለው የዞን 3 ሃላፊ ነው የሚከለክለኝ። እኔ አዲስ አበባ ዘመድ ስላለኝ በሰሃን ተቋጥራ የምትመጣልኝን ምግብ ከሌሎች ጋር ተካፍዬ እንዳልበላ ተደርጌአለሁ። ማውራትም መጫወትም አልቻልኩም። ተፅእኖ እየተደረገብኝ ነው። ይሄን ክረምት የከረምኩት ክራሞት እ/ር የቁጠረው።”

�አቤቱታ ሶስት። 5ኛ ተከሳሽ አባ ” እሳቸው[አባ ገ/እየሱስ] የተናገሩት በደልና ግፍ በኔ ላይም ደርሷል። እኔ ወገን የለኝም። በልጅነቴ ነው ወገኔን ትቼ ገዳም የገባሁት። በገዳሙ[ዋልድባ] የነበሩትን አፅመ ቅዱሳን አፈራርሰው ዛፎቹን ቆርጠው ክሰል እያወጡበት ነው። ይህን ተቃውመን ብንናገር አሸባሪ ተባልን።” አባ ይህን ሲናገሩ ዳኞቹ በፊት ስለተከሰተ ነገር ሳይሆን በማረሚያ ቤት ስለሚደርስባቸው በደል ብቻ መናገር ገልፀውላቸዋል። ሆኖም አባ “ስለበፊቱም ስለአሁኑም መናገር እችላለሁ” ብለው የነበረ ቢሆንም ዳኛው ስነስረአቱ እንደማይፈቅድላቸው ከገለፁላቸው በኋላ አባ በማረሚያ ቤቱ ስለሚደርስባቸው በደል ማሰማት ቀጥለዋል። ” በአንድ ወር ጊዜ ውስጥ 3ቴ እና 4ቴ ቢሮ እየጠሩ ያንገራግሩናል (ያስፈራሩናል ፤ ይዝቱብናል)። ፀሎት እንድንፀልይ አይፈቀድልንም። መንግስት ነው እንዴ ይቺን ሃገር የሚጠብቃት?! እ/ር ነው የሚጠብቃት! አበበ የሚባል ፖሊስ እና ካሱ የሚባል ኦፊሰር ‘አመፅ እያነሳሳችሁ ነው ጨለማ ቤት እናስገባችኋለን’ እያሉ ያስፈራሩናል። ከ2004 ጀምሮ እየተሰቃየን ነው። ገዳም እንዳንቀመጥ ተከለከልን። እናንተስ ለምንድነው እውነት ማትፈርዱልን? ለምን ፀሎት እንዳንፀልይ ተከለከልን?”

�አቤቱታ አራት። በእነ ተሰኢድ ኑርሁሴን ኑሩ ” የታሰርኩት አማራ ስለሆንኩ ነው። ጎንደሬ ስለሆንኩ ነው። ማእከላዊ ጥፍሬን ነቅለውኛል። ማእከላዊ የዘር ፍሬ ሚኮላሽበት የሶት ልጅ ጡት አስረው የሚጎትቱበት የስቃይ ቦታ ነው። እዚህ ያለነው ሁላችንም በማእከላዊ ስቃይ አሳልፈናል። በአደባባይ መናገር የቻልነው እና የደፈርነው ብቻ እንናገር ብለን ነው። እኔ የኪነጥበብ ሰው ነኝ። የዜማ እና የግጥም ደራሲ ነኝ። ያሰሩኝ ‘ላባ’ የተሰኘ ባለ መቶ ገፅ የግጥም መድብሌን ለማሳተም እየሄድኩ ሳለ ነው። እና የግጥም መድብሉ አልተመለሰልኝም። የጣሱት የሰብአዊ መብት እንኳን ሊመለስልኝ የሚቻል አይደለም። የግጥም መድብሌን ይመልሱልኝ። ከክሱ ጋር ግንኙነት የለውም። በማስረጃነትም አልተያያዘም። እያዝናና የሚያስተምር የስነፅሁፍ ስራ ነው። በተጨማሪም ፀሎት እንዳላደርግ ተከልክያለው። እኔ ሙስሊም ነኝ። እንዳልሰግድ ይከለክሉኛል። ክርስቲያኖችም እንዳይፀልዩ ተከልክለዋል። ከዚህ የመጣችሁ ቤተሰቦች ይህን በደላችንን ለሚዲያዎች ሁሉ ንገሩልን። ” ዳኞች የሰይድን አቤቱታ ከሰሙ በኋላ በማእከላዊ መርማሪዎች ተወሰደብኝ ያለውን የግጥም መድብል በተመለከተ ለማጣራት ከማእከላዊ የመጣ ፖሊስ መምጣቱን ጠይቀው ሲቪል የለበሱ እና ከአቃቤ ህግ ጎን ቁጭ ብለው ከነበሩ 3ት የማእከላዊ ፖሊሶች አንዱ በመቆም ከማእከላዊ መምጣቱን ለዳኞቹ መልስ ሰጥቷል። ፖሊሱ ስለጉዳዩ ሲጠየቅ የሚያቀው ነገር እንደሌለ የገለፀ ሲሆን ዳኞች በቀጣይ ቀጠሮ አጣርቶ ምላሽ ይዞ እንዲመጣ ካዘዙት በኋላ ስሙን ሲጠይቁት በችሎት ስሙን ለመናገር ፈቃደኛ ሳይሆን ቀርቷል። ዳኞች ከመታወቂያው ላይ ስሙን እንዲገለብጡም መታወቂያውን በማውጣትም በችሎት አስተባባሪ በኩል ለዳኞቹ ልኳል።

�አቤቱታ አምስት። በእነ ተሻገር ወ/ሚካኤል መዝገብ 28ኛ ተከሳሽ አራጋው፤ ” በማእከላዊ ድብደባ ያደረሱብን መርማሪዎች እዚሁ ቁጭ ብለዋል። ግፍና በደል ያደረሱብን እነሱ ናቸው። ያልሆነ ነገር ፤ ያላልነውን ፤ ያላደረግነውን ፅፈው በግዳጅ ያስፈረሙን እነሱ ናቸው። መርማሪው ስሙን ሲጠየቅ በግልፅ ያልተናገረበት ምክንያት ይታወቃል። የሰራውን ስለሚያውቅ ነው። ህግ ካለ በህግ እንዳኝ። እነዚህ [ወደ ማእከላዊ መርማሪ ፖሊሶች እየጠቆመ] መርማሪዎች ናቸው፤ ደብዳቢዎች ናቸው እንደገና እዚህ መጥተው ደግሞ ይከታተሉናል። ምስክርም የሚሆኑት እነሱ ናቸው። ብዙ ነገር ሆነው ነው የሚሰሩት። ” ዳኞች የአራጋውን አቤቱታ ሰምተው ከማእከላዊ የሚመጡ ፖሊሶች እንደማንኛውም ሰው መጥተው ችለቱን መከታተል እንደሚችሉ እና የመከልከል ስልጣን እንደሌላቸው ተናግረዋል።

�አቤቱታ ስድስት። በእነ ተሻገር ወ/ሚካኤል መዝገብ ተከሳሽ ሙላቱ ተሰማ ፤ ” ማእከላዊ በነበርኩ ጊዜ አሁን ልገልፀው በማልችለው አካሌ ላይ ድብደባ ደርሶብኛል። ከተፈቀደልኝ ልብሴን አውልቄ አሳያለሁ። እኔ የአንድነት የፍትህ እና ዲሞክራሲ ፓርቲ አባል ነኝ እንጂ አሸባሪ አይደለሁም። ካሸባሪም ጋር የምገናኝ አይደለሁም። ቂሊንጦ ጠባብ ክፍል ውስጥ አርባ እና ሃምሳ ሆነን ነው የምንኖረው። በ90ሳሜ ፍራሽ ላይ ለሁለት ነው ምንተኛው የሚቀርብልን ምግብ ተመጣጣኝ አይደለም። ቤተሰቡ ቅርብ ያለ የሚቋጥርለትን ይበላል። እኛ ሚጠይቀን የሌለ በቂ ምግብ አናገኝም። የክልላችን ፍርድ ቤት ስልጣን ስላለው ክሳችን ወደ ክልላችን ይዙርልን።”

�አቤቱታ ሰባት። በነተሻገር ወ/ሚካኤል መዝገብ ተከሳሽ ተስፋሁን ማኔ ፤ ” ማእከላዊ እያለሁ መርማሪው ተምረሃል ወይ ብሎ ጠየቀኝ። አዎ ስለው ፤ ስንት ጊዜ ወደቅክ አለኝ። አልወደቅኩም ስለው፤ አማራ ደደብ አይደለ እንዴ እንዴት አልወደቅክም? አለኝ። በቂሊንጦም ግንባታ እያስፋፉ ነው። ለግንባታው የሚሆን ድንጋይ በግዳጅ እንድሸከም እየተደረኩ ነው። ጀርባዬ ተላልጧል። ጉዳያችን በክልላችን ይታይልን።”

ለይቅርታ ያመለከተችው ‘ዘማሪት’ ምርትነሽ ጥላሁን: በምልአተ ጉባኤው ፊት ቀርባ አስረዳች፤ በይቅርታ ተቀበላት፤ በቡራኬ አሰናበታት

• በቅዱስ ሲኖዶስ ጽ/ቤት አስተባባሪነት የሚዲያ መግለጫ ትሰጣለች፤
• ለሌሎችም መመለስ ጥረት እንድታድርግ ብፁዓን አባቶች አሳሰቧት፤
• “ቤተ ክርስቲያን የይቅርታ ቤት ናት፤ጥፋታቸውን አምነው ከመጡ እንቀበላቸዋለን፤” /ብፁዓን አባቶች/
†††
Singer Mirtenesh Tilahun & EOTC Holy Synod
ፎቶ፡ ዘማሪት ምርትነሽ ጥላሁን እና የኢ.ኦ.ተ.ቤተ ክርስቲያን ቅዱስ ሲኖዶስ ጉባዔ

የቅዱስ ሲኖዶስን የምሕረት ጥሪ በመቀበል፣ የቤተ ክርስቲያንን አስተምህሮና ሥርዓት ከሚገዳደረው የእነበጋሻው ደሳለኝ ሕገ ወጥ ቡድን፤ ራሷን ለይታ፣ ይፋዊ የይቅርታ ጥያቄ ያቀረበችው ‘ዘማሪት’ ምርትነሽ ጥላሁን፣ የምልአተ ጉባኤውን ይቅርታ አገኘች፡፡

የቤተ ክርስቲያን ጉዳዮችን በተመለከተ፣ ለጥፋተኞችና ለበደለኞች እንደጥፋታቸው መጠን ምሕረት የመስጠት፣ ይቅርታ የማድረግና አስፈላጊ ከኾነም በቀኖና የመቅጣት ሥልጣን ያለው የቅዱስ ሲኖዶስ ምልአተ ጉባኤ፣ በዛሬ፣ ጥቅምት 16 ቀን 2010 ዓ.ም. የቀትር በኋላ ውሎው፣ የ‘ዘማሪት’ ምርትነሽን ማመልከቻ ተቀብሎ ይቅርታ አድርጎላታል፡፡

የይቅርታ ማመልከቻዋ፣ በምልአተ ጉባኤው ፊት በንባብ ሲሰማ፣ ከሕገ ወጥ ቡድኑ ጋራ በአባሪነት ትንቀሳቀስ እንደነበር የጠቀሰችው ‘ዘማሪት’ ምርትነሽ፣ ጥፋት መፈጸሟን አምና ይቅርታ እንዲደረግላት ጠይቃለች፡፡

“ከእነርሱ ጋራ የነበርኩ ቢኾንም፣ የዓላማቸው ተከታይ አይደለሁም፤” ያለችው ‘ዘማሪት’ ምርትነሽ፣ ሕገ ወጡ ቡድኑ ቤተ ክርስቲያንን የሚጎዳ እንቅስቃሴ በማድረጉ ለመለየት መወሰኗን ገልጻለች፡፡ “እነርሱ ወደ ሌላ እምነት ቢሔዱም የእኔ እምነቴ ኦርቶዶክስ ተዋሕዶ ነው፤ ወዳሳደገችኝ ቤተ ክርስቲያኔ ተመልሻለሁ፤ አስተምህሮዋንና ሥርዓቷን ጠብቄ እኖራለሁ፤” በማለት ውሳኔዋን ለምልአተ ጉባኤው አረጋግጣለች፡፡
በይፋ ለመመለስ መወሰኗን አድንቀው ምክር የሰጡ ብፁዓን አባቶች፣ “ተቀብለንሻል” ብለዋታል፡፡ እንደ እርሷ፣ ጥፋታቸውን አምነው የሚመለሱ ሌሎችም ካሉ፣ የይቅርታ ቤት የኾነችው ቤተ ክርስቲያን እጆቿን ዘርግታ እንደምትቀበላቸው አስታውቀዋል፤ የበኩሏን ጥረት እንድታደርግም አበረታተዋታል፡፡

በመጨረሻም፣ ቡራኬ እንድትቀበል የታዘዘችው ምርትነሽ ጥላሁን፣ ከርእሰ መንበሩ ብፁዕ ወቅዱስ ፓትርያርክ አቡነ ማትያስ ፊት ወድቃ መስቀል ከተሳለመች በኋላ በይቅርታና ቡራኬ መሰናበቷ ተገልጿል፡፡
በቅርቡም፣ በቅዱስ ሲኖዶስ ጽ/ቤቱ አስተባባሪነት፣ የጠቅላይ ጽ/ቤቱን ቴሌቪዥንና ጋዜጣ ጨምሮ ለብዙኃን መገናኛዎች መግለጫ እንደምትሰጥ ተጠቁሟል፡፡

የቅዱስ ሲኖዶስ ምልአተ ጉባኤው፣ የምርትነሽ ጥላሁንን የይቅርታ ጥያቄ ተቀብሎ ምሕረት ያደረገላትና በቡራኬ ያሰናበታት፣ የተሐድሶ ኑፋቄ ተላላኪ በጋሻው ደሳለኝን አውግዞ ከቤተ ክርስቲያን በለየበት ማግሥት መኾኑ ትኩረት ያሰጠዋል፡፡

ከሕገ ወጥ ቡድኑ ተለይታና የምሕረት ጥሪውን ተቀብላ ለመመለስ ለወሰነችው ምርትነሽ ጥላሁን፣ በዛሬው ዕለት የተደረገላት ሲኖዶሳዊ ይቅርታና አቀባበል፣ ብዙዎች፣ ራሳቸውን ከኑፋቄው ተጽዕኖ ቶሎ በማላቀቅ፣ ዛሬ ነገ ሳይሉ ወደ እናት ቤተ ክርስቲያናቸው እንዲመለሱ የሚያበረታታ አብነታዊ እንደ ኾነ አያጠያይቅም፡፡

ምንጭ፦ ሐራ ተዋሕዶ

የፌደራል ፖሊስ ኮሚሽን አባል የ”ሽብር” ክስ ቀረበበት

በጌታቸው ሺፈራው

አዴኃን የአርበኞች ግንቦት 7 ክንፍ ነው ሲል አቃቤ ህግ ክስ አቀረበ
• የፌደራል ፖሊስ ኮሚሽን አባል የ”ሽብር” ክስ ቀርቦበታል

የፌደራል ጠቅላይ አቃቤ ህግ የአማራ ዴሞክራሲያዊ ኃይሎች ንቅናቄ (አዴኃን) የአርበኞች ግንቦት 7 ክንፍ ነው ሲል ክስ አቅርቧል። ዛሬ ጥቅምት 6/2010 ዓ•ም የፌደራል ፖሊስ ኮሚሽን ወንጀል መከላከል አባል በነበረ ግለሰብ ላይ በቀረበው የ”ሽብር” ክስ አዴኃን የአርበኞች ግንቦት 7 ክንፍ ነው በሚል ተጠቅሷል። አቃቤ ህግ የፌደራል ፖሊስ ኮሚሽን አባል የነበረው ኮንስታብል ብርሃን በላይ ቸኮል ላይ ባቃረበው ክስ አዴኃንን የአርበኞች ግንቦት ሰባት ክንፍ ከማለቱም ባሻገር የ”ሽብር ቡድን” ሲል በ”ሽብር” ፈርጆታል።

በፌደራል ከፍተኛ ፍርድ ቤት ልደታ ምድብ 19ኛ ወንጀል ችሎት ዛሬ በተነበበው ክስ ኮንስታብል ብርሃን አማራ ክልል ምዕራብ ጎጃም ዞን ጃቢጠና ወረዳ አውንት ጎንቻ ጫካ ውስጥ ከሚንቀሳቀሱት ቄስ ደመቀ ዓለሜ፣ አበባው መኮንን፣ አበራ ምናሉ፣ ልቅናው ምህረት፣ ምትኩ ፀጋዬ፣ ዮናስ ጋሻው እና ደሳለኝ የተባሉ የአዴኃን ታጣቂዎች ጋር አብሮ እንዲሰራ ተልዕኮ ተሰጥቶት ተስማምቷል የሚል ክስ ቀርቦበታል።

በተጨማሪም ፌደራል ፖሊስ ኮሚሽን ውስጥ ያሉና የከዱ ጠንካራ አባላትን ለመመልመል ተስማምቷል፣ አባላትን መልምሎ ወደ ኤርትራ ልኳል፣ ባህርዳር አካባቢ ሆኖ ለአዴኃን ለመስራት ተስማምቷል፣ ስለ ፌደራል ፖሊስ ኮሚሽንና አመራሮቹ ጠቃሚ መረጃ ለአዴኃን ሰጥቷል የሚል ዝርዝር ክስ ቀርቦበታል።

አቃቤ ህግ “በኢፌዲሪ የፌደራል ፖሊስ ኮሚሽን የወንጀል መከላከል ዘርፍ አባል ሆኖ ሲሰራ ህገ መንግስቱንና ህገ መንግስታዊ ስርዓቱን ለመጠበቅ የገባውን ቃል ኪዳን በማፍረስ እራሱን የአርበኞች ግንቦት 7 በማለት በሚጠራው የሽብር ቡድን ክንፍ በሆነው የአማራ ዴሞክራሲያዊ ኃይሎች ንቅናቄ በማለት በሚጠራው የሽብር ቡድን” አባል ነው በሚል ባቀረበው ክስ ኮንስታብል ብርሃንን የአርበኞች ግንቦት 7፣ እንዲሁም የአርበኞች ግንቦት 7 ክንፍ የሆነው አዴኃን አባል ነው የሚል ክስ አቅርቦበታል። አባላትን በመመልመል፣ በማደራጀት፣ ለአዴኃን አባላትና አመራሮች መረጃ በማቀበል ” በሽብርተኛ ድርጅት ውስጥ አባል መሆን በማንኛውም መልኩ በመሳተፍ ወንጀል” ክስ የቀረበበት ኮንስታብል ብርሃን የክስ መቃወሚያ ለማቅረብ ለጥቅምት 29/2010 ቀጠሮ ተሰጥቶታል።

የአማራ ዴሞክራሲያዊ ኃይሎች ንቅናቄ በፀረ ሽብር አዋጁ ከተፈረጁት የፖለቲካ ቡድኖች ውስጥ እንዳልሆነ የሚታወቅ ሲሆን በፀረ ሽብር አዋጁ ባልተፈረጁት የአማራ ዴሞክራሲያዊ ኃይሎች ንቅናቄ (አዴኃን)፣ የጋምቤላ ህዝቦች ነፃነት ንቅናቄ ( ጋህነን)፣ የቤኒሻንጉል ህዝቦች ነፃነት ንቅናቄ (ቤህነን)፣ የትግራይ ህዝብ ዴሞክራሲያዊ ንቅናቄ (ትህዴን)፣ የሲዳማ አርነት ንቅናቄ (ሲአን) አባልነት በ”ሽብር”የተከሰሱና የተፈረደባቸው ኢትዮጵያውያን እንዳሉ ይታወቃል።

በአዋጁ በ”ሽብርተኝነት” ያልተፈረጁ ድርጅቶች ከአርበኞች ግንቦት 7 እና ኦነግ ጋር ግንባር ፈጥረዋል፣ አብረው ስራ እየሰሩ ነው እንዲሁም በ”ሽብር” የተፈረጁት ድርጅቶች ክንፍ ናቸው በሚል በድርጅቶቹ ስም ክስ የሚቀርብባቸው ተከሳሾች አቀቤ ህግ የሚያቀርብባቸውን ክስ በሀሰት እና ሆን ተብሎ ለማጥቃት የቀረበ ነው ሲሉ ተደምጠዋል።

%d bloggers like this: